ESTHER GARCÍA LÓPEZ

 

Faraguyas

 

 

 


PRIMAVERA

  

Chovéu, albancióu.

Serenóuse la tarde

Dormecéu’l Sol.

 

Debaxo la sebe

sapos secos, sedientos

bieben agua verde.

 

L.luz,  primavera,

sueña la mariselva.

Póusase l’abea.

 

Siete gatos raros

miau, miau, miaumarramamiáu.

Miagan como magos.

 

Aquel esperteyu

con mantu coloráu

durme nel teyáu.

 

L.ladran  rapiegas

alborótanse  las pitas

ya las parpayegas.

 

Cucu-cuquiellu

¿Ya cuántos años cantas?

¡Cuánto te quiero!

  

Las mariposas

esqueiran ente  flores

güelen golores.

 

Na primavera

Chegan los paxarinos.

L.lonxanas tierras.

 

Siéntese l’ecu

de los truenos  qu’atruenan.

Voces no cielu.

 

Un babarón

Abel.lugáu nun estal.lón

Run-run, ron-ron.

 

Sueñan los gril.los

ya píden-y al Nuberu

que nun dea  gritos

 

Foguera San Xuan,

espierta’l fou folgazán,

queima la nueite.

 

Xiplíos del aire

Cantares de la tarde

Arrol.lan al Sol.

 

Nueite de l.luna

solombras  bail.larinas

pola  l.laguna.

 

Al riscar l’alba

rel.luman los árboles.

L.luz d’alborada.

 

L’augua la charca

arroubó-y a la L.luna

un cachu cara.

 

Nueite qu’espierta

esqueicéu la escuridá

enriba la cama.





 

BRANU       

 

Brisa bril.lante

Bramann las folas  fozcas

Branu que brota.

  

Una abea maga

ronda, rumba, ronca.

Rumbíu  romboidal.

 

Cantan encantas

Bieben bril.los d’augua.

Cantan, ¿qué cantan?

 

Polos caminos

espárcense arumes

a toxos ya  pinos.

 

Con muita galbana

pasa una culuobra

pa la furaca.

 

Rinse los palombos

Ya picotian nel parque

faraguyas del Sol.

 

Riscar coloráu.

Madruga’l Sol ya espierta

las flores del prau.

 

Árboles cansaos,

colos güeyos al Sol

descansan  deitaos.

 

Las mariquitas

polas canas del xardón

xuben,  tiqui, tica…

 

Borrayu del Sol

L.lamparadas de fou

Arde la tarde.

 

Polas ventanas

del l.loureiru que durme

la l.luz galana..

 

Al.luma la L.luna

la nueite asonsada,

deitada na cuna.

 

Vi na l.laguna

La cara de la L.luna

¡Cara de chuvia!

 

Como un reyu l.largu

cuerre  un escolanciu

pol camín solanu.

 

Xiplíos del aire

Dormecen las flores

Sueñan golores.

 

L.loureiru, beneitu

escuerren al Nubeiru.

Floritos del vientu.

 

Carreiru estreitu

Chen d’artos ya mouras

¿Quién vei recorrelu?

 

Un viérbene de l.luz

durme ente la yerba

ya al.luma una uz.

 

Arándanos raros

miedran nos teyaos,

roxos ya moraos.

 

Las andolinas

son llunarinos negros

que bordan l’aire.

 


 

SERONDA

 

 

Dormez la tarde

ente chuvia de fueyas

ya gotas d’aire.

 

Seronda mariella

el cielu  empedráu,

la nueite  miedra.

  

Col cayáu na mano

petóu na mia puerta

l’airón mui gafu.

 

Ruxen las fueyas,

espierta la xelada

muitu cansada.

 

Escaparates

los maniquís sol.liertes

¡Qué disparate!

 

Tardes pequenas

Seronda serondiega

Sos una nena.

 

Castañas ya nueces.

Amárranse los esguiles

polos l.lamberetes.

  

Esnúdase l’árbol

ya espúrrese enxencle.

Xuega col aire.

  

Fueyas podridas

alimentan l.lombrigas

ente la tierra.

 

Estrel.las chorosas

caen l.larimas de l.luz

pola  l.lumera.

 

Nueite entiznada,

ennueitada la nueite;

la l.luz cal.lada.

 

 

 

IVIERNU

 

Augua redonda.

La chuvia nos cristales

Chora que chora.

 

Cachones chapican.

Las folas encrespadas

dibuxan  l’augua.

 

Povisas prietas

ente  neblina piecha

aterecidas.

 

Marexada gafa.

Glayan las gaviluetas

emparexadas.

 

Xelada xélida

estal.lan las pozas

Xelu que corta.

 

Flotan no mar

cachos de L.luna roxa.

Rompéu la l.luz.

 

Goteras na cera

chapicando la calle

llantu de chuvia.

  

Cara de la L.luna,

no espeyu de  xelu,

piensa frialdá.

  

Sueña l’esbardu

que suerbe miel no cortín.

¡Dulzor dulcín!

 

Folas muito gafas

que chocan nos cantiles,

chuchan las auguas.

 

Las gaviluetas chuezas

glayan, choran, cantan

polas talayas.

 

Días d’iviernu

Do rmecéu la nueite

a sueñu ciegu.

 

Mar engafada

los pexes escuéndense

la ouca canta.

 

Anióuse’l cierzu

pente ríos ya fontes

tien fríu no peitu

 

Bordada de mofu

la parede’l fontín

¡Verdosu  verdín!

 



Esbilla del  llibru Faraguyas-haikus. Poemas pequenos pa nenos grandes.

Mª Esther García López

E. Madú.

Estos poemas fueron colgados en la Red

a los ocho días andados del mes

de febrero

del año dos mil diecisiete.